හිතක් පපුවක් නැති රතු ෂර්ට් කාරයෝ.. පාහරයෝ.. I

අපේ සාමාන්‍ය ස්වභාවය තමා මොකක් හරි ප්‍රශ්නයක් අපේ ලඟටම එනකන්ම ඒක නොසලකා හැරීම. අර කතාවකුත් තියෙන්නෙ “dont trouble the trouble until trouble troubles you” කියලා. එහෙම නැත්නම් අපිට සම්භන්ධ දෙයකට බලපෑමක් වෙනකම්. මට මේ ගැන කියන්න හිතුනේ තායිලන්තයේ දේශපාලන අවුල මේ හැතැම්ම දහස් ගානක් එහා ඉන්න මටත් බලපාපු නිසා. 2006 වසරේ පටන් ගත්තු මේ අවුලේ හොඳම හරිය පහුගිය සති කීපයේදී බලාගන්න පුලුවන් උනා. ඒක (තාවකාලිකව) අවසන් උනේ රතු කමිස කාරයෝ බැන්කොක් නගරයේ තැන් කීපයක්ම ගිනිබත් කරල. එතනින් එකක් තමයි central world කියන්නෙ.  මේ සාප්පු සංකීර්ණය අග්නිදිග ආසියාවේ දෙවනි විශාලම සාප්පු සංකීර්ණය.

Central World complex

ඒකේ තියෙනවා මම මගේ ජීවිතේ දැක්ක ලොකුම බුක් ෂොප් එක. අපිට ඒකේ පොත් කියවන්න පුලුවන්. මම තායිලන්තේ ඉන්න කාලේ පැය ගණන් ඒකට වෙලා පොත් කියවනවා. වාඩි වෙන්න සැප පුටු තියෙනව. කවුරුත් මුකුත් කියන්නෙ නෑ කොච්චර වෙලා හිටියත්. සමහර වෙලාවට සම්පූර්ණ පොතක්ම කියවනව පොත් සාප්පුව ඇතුලේ ඉඳන්ම.

Asia Books Bookshop

සමහර වෙලාවට මම සල්ලි වලට පොතක් අරගෙන Starbucks එකට ගිහින් medium size cappuccino එකක් extra whip cream එක්ක අරගෙන පාර අයිනේ තියෙන පුටුවක වාඩි වෙලා පොත කියවනව. නැත්නම් පාරෙ යන මිනිස්සු දිහා බලාගෙන ඉන්නව. තව මෙහෙම කියන්න බැරි ගොඩක් දේවල් තියෙනව Central World එක්ක බැඳුණු.

Reading the Angels and Daemons with a cappuccino

රතු කමිස කාරයෝ විනාස කලේ මගේ ජීවිතේ වැදගත් වෙන තැනක්. අල්ලපු ගෙදර කෙනෙක් මැරෙනවට වඩා අපේ හිතට බලපානව අපේ පවුලේ කෙනෙක් මැරුණොත්. ඒක සාමාන්‍යයි. ඒත් මේ දේශපාලන වියවුල් නිසා මැරුණු මිනිස්සු ගැන පොඩ්ඩක්වත් අවධානයක් නොයොදවපු මට Central world එක විනාස කරල කිව්වම නිකන් ඇඞෙන්න වගේ. මට මනුස්ස ජීවිතේකට වඩා ගොඩනැගිල්ලක් ලොකු උනාද ? එක්තරා විදියකින් හිතට ලැජ්ජාවකුත් ඇති නොවෙනවා නෙමේ. එක අතකට අවුරුදු 30ක් පුරාවටම මහපාරේ බල්ලො බලල්ලු වගේ මිනිස්සු මරල දාල තියෙනව දැකපු අපට මරණය එච්චර ලොකු issue එකක් නොවෙන එක අමුත්තකුත් නෑ. අපි පුරුදු වෙලා.

තායිලන්තයේ දේශපාලන අර්බුදය පටන් ගන්නේ 2006 දී අගමැති තක්ෂින් හමුදා කුමන්ත්‍රණයකින් බලයෙන් පහ කිරීමෙන්.

තක්ෂින් ශිනවත්‍රා

තක්ෂින් පැවත එන්නේ “හක්කා චීන” ජන වර්ගයෙන්. ඔහුගේ මී මුත්තා චීනයෙන් තායිලන්තයේ චැන්ග් මයි ප්‍රදේශයට සංක්‍රමණය වුණු කෙනෙක්. 1938 විතර මේ පවුලම තමන්ගේ “කූ” (KHU) කියන වාසගම අතඇරල “තක්ෂින්” කියන තායි වාසගම පාවිච්චි කරන්න ගත්තා. තක්ෂින්ගේ අම්මාගේ පැත්තේ මිත්තණිය රජ කුමාරිකාවක්. තාත්තා චැන්ග් මයි පලාතේ මංත්‍රී විදියට පත් වුණා. තක්ෂින් ඉපදෙනකොටත් “ශිනවත්‍රා” පවුල චැන්ග් මයි පලාතේ ධනවත්ම වගේ ලොකු බලපෑමක් කරන්න පුලුවන් පවුලක්. පොලිස් නිලධාරියෙක් හැටියට මුලින්ම කටයුතු කරපු තක්ෂින් පස්සේ කාලෙකදි රස්සාවෙන් ඉවත් වෙලා තමන්ගේ ව්‍යාපාර කිහිපයක් පටන් ගත්තත් ඒ ඔක්කොම වගේ අසාර්ථක වුණා. ඔහු පටන් ගත්තු AIS (Advanced Info Service) ඉතාමත් සාර්ථක වුණා.

දේශපාලනය

1994 දී විදේශ ඇමති හැටියට තමයි ඔහු දේශපාලනය ආරම්භ කරන්නේ. 1996 සුලු කාලයකටත් නැවත 1997 දීත් ඔහු උප අගමැති හටියට කටයුතු කරල තියෙනවා. 1998 දී Thai Rak Thai පක්ෂය ඔහු පටන් ගත්තා. 2001 මැතිවරණයේදී විශිෂ්ඨ ජයක් ලබන්න ඔහුටත් ඔහුගේ පක්ෂයටත් පුලුවන් උනා. තක්ෂින් අගමැති විදියට පත් උනා. තායිලන්තයේ මෙතෙක් කාලයකට සම්පූර්ණ නිල කාලයම තනතුරේ හිටපු එකම අගමැති වරයා ඔහු තමයි. ආර්ථික, සෞඛ්‍ය, බලශක්ති, සමාජීය, විදේශ සබඳතා වගේ අංශ වල ලොකු වෙනසක් කරන්න ඔහු උත්සාහ කලා. වැඩි අවධානයක් ගත්ත ආර්ථික සා සෞඛ්‍ය ප්‍රතිපත්ති ගන විතරක් ගන මම කියන්නම්.

ආර්ථික ප්‍රතිපත්ති

ග්‍රාමීය ආර්ථිකය දියුණු කරන්න ඔහු ලොකු උත්සාහයක් ගත්තා. ග්‍රාමීය ක්ෂුද්‍ර ණය වැඩසටහන් පටන් අරගෙන ග්‍රාමීය සංවර්ධන අරමුදල් වලට ඍජු ප්‍රේෂ්ණ ලබාදුන්නා. අඩු පොලී කෘෂි කාර්මික ණය ලබා දුන්නා. ඒ වගේම තවත් වැදගත් ව්‍යාපෘතියක් තමා One Tambon One Product (OTOP) කියන්නෙ. Tambon කියන්නෙ උප දිස්ත්‍රික්කයකට. මේකට මුල් අදහස ලැබෙන්නේ ජපානයේ සාර්ථකව ක්‍රියාත්මක වුණු One Village One Product (OVOP) වැඩසටහනෙන්.

මේ ආර්ථික ප්‍රතිපත්ති කොච්චර දුරට සාර්ථක වුනාද කිව්වොත් ආසියානු මූල්‍ය අර්බුදයෙන් ගොඩ එන්න ජාත්‍යන්තර මූල්‍ය අරමුදල තායිලන්තයට දුන්න ණය නියමිත කාලයට අවුරුදු 2 කට කලින් ගෙවන්න පුලුවන් උනා. 2001 – 2006 කාලය ඇතුලත දල ජාතික ආදායම (GDP) බාත් ට්‍රිලියන 4.9 ඉඳන් 7.1 ට වැඩි උනා. තායිලන්තයේ දුප්පත්ම පලාත ඊසානදිග තායිලන්තයේ ආදායම 46% කින් වැඩි උනා. රටේ දුප්පතුන්ගේ ප්‍රතිශතය 21.3% ඉඳන් 11.3% ට බැස්සා. මේ ආර්ථික දර්ශක වලින් කීපයක් විතරයි. අනිත් හැම එකක්ම මේ විදියටම දියුණුවක් පෙන්නුවා.

පාතාලය විසින් මෙහෙයවපු ලොතරැයි ක්‍රමය නීත්‍යානුකූල එකක් කරල එයින් ලැබෙන ආදායම තක්ෂින් යෙදෙව්වේ “එක දිස්ත්‍රික්කයකට එක ශිෂ්‍යත්වයක්” වගේ සමාජ ව්‍යාපෘති වලට.

සෞඛ්‍ය ප්‍රතිපත්ති‍

තක්ෂින්ගේ අවධානය දිනාගත්තු වැඩසටහන් දෙකක් තියෙනව. පලවෙනි එක වගේම වැදගත්ම එක තමා විශ්වීය සෞඛ්‍යාරක්ෂණ වැඩසටහන. මේ මගින් සෞඛ්‍ය රක්ෂණයක් නැති ජනතාවට සැලසුණු සේවය නම් කියල නිම කරන්න බහැ. මේ හේතුව නිසාම තක්ෂින්ගේ ජනප්‍රියතාවය අඩු ආදායම් ලාභීන් අතරේ බොහොම ඉහල ගියා. ඒ උනත් මේ වැඩසහටහන ගොඩක් විවේචනයට ලක් උනා. රාජ්‍ය අංශයේ සෞඛ්‍ය සේවකයෝ වැඩි පඩි සහ වඩා හොඳ රැකියා පරිසරයක් වෙනුවෙන් පෞද්ගලික අංශයේ රැකියාවන්ට යොමු උනා. මෙයින් වෙච්ච එක හොඳක් නම් සෞඛ්‍ය සංචාරක කර්මාන්තය (Health Tourism) වේගයෙන් දියුණු වීමයි. 2005 වසරේදී ඉන් ලැබුණු ආදායම ඇමරිකන් ඩොලර් මිලියන 800 ක්.

ඔහුගේ අනිත් වැඩසටහන HIV ආසාධිතයන් වෙනුවෙන්. අඩු මුදලට anti-retro-viral HIV medication ලබාදෙන්න කටයුතු යෙදුවා.

තක්ෂින්ට එරෙහිව එල්ලවූ චෝදනා, හමුදා කුමන්ත්‍රණය සහ රතු-කහ කමිස යුද්ධය ඊලඟ ලිපියෙන්…..